وصفة : كيف أتخلّص من عيوب زوجي ؟!

إذا كان زوجك فيه أي عيب ، مهما كان مهما صار بينكم..مهما كبرت المشاكل

أقدم لك هدية بسيطة كفيلة بإذن الله إنها تنهي كل ذلك..

أنا هنا أكتب من واقع تجربه عشتها مع زوجي - ثلاث سنين من التنافر والخلافات وأنواع الجروح والاهانات !

كل عيوب الدنيا كانت فيه:

الصلاة في البيت والعصر يصليها مع المغرب

يحب يطلع من البيت ومايصدق يلقى فرصة للخروج

يتأخّر لدرجة إنه ممكن يجلس ست أو سبع ساعات برا

إذا رجع يا ينام يا يطالع ام بي سي 2-او فور - وقناته المفضلة روتانا سينما

وانتم أعرف ببلاوي هالقنوات !!

عصبي

غيور جدا جدا

منغلق

يحب التحطيم

ثقافته أي كلام كل ما أسأله عن شي يفغر - وإذا كان مرة مثقف قال : مدري !!

هوايته الضرب…والله عليه كفوف تخلي البيت يدور

مايحب يكشخ لي أبداً أبداً أبدا ، وإذا مرّة كشخ لبس لي ثوب بدون شماغ..

يعني مافيه حيلة ، ولابه أمل ؛ وعكسي تماما ، عانيت الين ربي منّ عليّ بالدواء لكل ماسبق من بلاوي

وانا هنا أذكر تجربتي لأنّي والله أحب لكم الخير من قلبي ، وحاسة بكل متزوجة زوجها غثيث

الحل والدواء يالغاليات هو:

1 - الاستغفار .

والله العظيم إنّي شفت العجايب من الاستغفار ، أحاول كل ما اذكر استغفر مايهم كم العدد المهم قد ماتقدرين .

2 - سورة البقرة .

يابنات عجيبة هالسورة_لها أثر فوري جداً ومن أول جزء حسيت زوجي تغير 180 درجة !

حاولي كل يوم تقراين جزء ، وترى موصعب الجزء يمكن ياخذ منك ثلث ساعة بالكثير ، وحاولي بعض الأحيان تقراين وزوجك موجود عشان يسمعك ويحس ويستحي على دمه ويقرا هو بعد .

ترى ياحلوات هالسورة عجيبة عجيبة عجيبة واللي تقراها وما يصير زوجها طيب معها تكتب لي وانا مستعدة احاول معها لين توصل للنتيجة .

3 - الرواقة .

خليك طوال اليوم رايقة ، عيشي حياتك…اصحي متى ما صحيتي بدون منبه ولا خرابيط” إلاّ إذا فيه موعد صلاة” أفطري أحلى فطور ، افتحي قناة عالم حواء وتابعي أحلى خلطات ، سحّبي ارجولك في المشي”بس اذا جاء زوجك زيدي الحركة شوي لا يقول زوجتي عجوز”البسي أحلى ملابسك وسرحي شعرك بطريقة عفوية تمايلي قدام المرايه واضحكي لها الوجه الصبوح”يازينك”

دلعي عمرك ..

نشدي وانت تطبخين أو تشتغلين حتى لو صوتك شين يمكن يحلى مع الأيام ، ويمكن يعجب زوجك…حتى لو ما اعجبه نشدي ولا عليك منه…اصلا يخب عليه صوتك الحلو…

حاولي تستفزين زوجك بالمزح حتى لوثقيل ، غصبا عليه يقبله هو ووجهه !!

إذا عاب زوجك شي فيك قولي له اتحداك تلقى فيني عيب..تحديه من جد وخلي جملتك واثقة…واذا عنّد معك وطلع عيوب الدنيا اللي فيك قولي له:”ما لقوا في الورد عيب قالوا له ياأحمر الخدين”

ترى قوية هالعبارة وتسكته لو طول لسانه مترين !!

إذا طلّع عيب في أكلك قولي له وش عرفك بأصول الطبخ الايطالي؟؟

يعني أي طبخة تخترب قولي له ايطاليه لأن الأكل الايطالي كله بهار وملح ومعجون على بعضة واللي ماتصدقني تروح مطعم المذاق الايطالي …بالرياض

المهم روقي عمرك

الدنيا ماتسوى

خلي الابتسامة ميزتك

ولا تسوين ذكية وعصبية وعلى بالك كوندليزا رايس على غفلة

المهم طولت عليكم بس تلخيص كل هالهذرة:

الاستغفار + سورة البقرة + ذكرالله + الرواقة والأخلاق = حياة سعيدة بإذن الله .

م/ن : بتصرّف يسير

الكاتب : شمشونة

27-02-2015 | 4867 مشاهدة